តារាកំប្លែង លោក ចែម ចាន់រ៉ា​ ហៅនាយពាក់មី បានសម្រេចបំណងប្រាថ្នារបស់ វីរៈកងទ័ពមួយរូបឈ្មោះ ព្រឿង សុជាតិ ដោយតារាកំប្លែងប្រុសរូបនេះបានផ្តួចផ្តើមកៀរគរថវិកាពីសប្បុរសជនក្នុងការជួយសាងសង់ផ្ទះ ១ខ្នង ជូនដល់កងទ័ព សុជាតិ ដោយសារមើលឃើញថាគាត់មានជីវភាពខ្វះខាតគ្មាននៅជម្រកសមរម្យ ណាមួយក៏ដើម្បីជាការគោរពដឹងគុណចំពោះវីរៈភាពដ៏អង់អាចក្លាហានក្នុងការការពារបូរណភាពទឹកដីនាពេលកន្លងមក។

យ៉ាងណាមិញ បើគិតតម្លៃសរុបនៃការសាងសង់ផ្ទះថ្មីគិតជាទឹកទំហំប្រាក់ខ្ទង់ជាង ១មុឺនដុល្លារ ដោយមកទល់ពេលនេះ នាយពាក់មី ទទួលបានទឹកថវិកាជំនួយពីសប្បុរសជនជិតឆ្ងាយទាំងក្នុង និងក្រៅប្រទេសបានប្រមាណជា ៣០លានរៀល ដោយក្នុងនោះមានរួមបញ្ជូលថវិកាផ្ទាល់របស់ នាយ ពាក់មី ចំនួន ១០លានរៀល ថែមទៀតផង។

សូមបញ្ជាក់ផងដែរថា នេះមិនមែនជាលើកទី១នោះទេដែល លោក ពាក់មី បានផ្ដួតផ្តើមគៀរគថវិកាពីសប្បុរសជនជួយសាងសង់ផ្ទះដល់វីរៈកងទ័ព ដោយផ្ទះទី១លោកបានសាងសង់ជូនវីរកងទ័ពមួយរូបដែលប្រជាជនខ្មែរដាក់រហ័សនាមថា (រ៉ាំបូខ្មែរ) ដោយទឹកចិត្តដ៏ប្រពៃនេះហើយ ទើបធ្វើឲ្យមហាជនស្ញប់ស្ញែង និងកោតសរសើរដល់ តារាកំប្លែង នាយពាក់មី ផងដែរ៕ អត្ថបទដោយ៖ Sun Darasy