ម្ចាស់អាជីវកម្ម និងកសិករក្នុងស្រុកលើកឡើងថា ការបិទច្រកព្រំដែនកម្ពុជា-ថៃ គឺជាឱកាសសម្រាប់កសិករ និងអ្នកស្រលាញ់វិស័យកសិកម្ម អាចពង្រឹងការដាំដុះកសិផលរបស់ពួកគេ ហើយអាចនឹងងាយលក់ផលិតផលកសិកម្មបន្លែ ផ្លែឈើ និង ត្រី សាច់របស់ពួកគេ កាន់តែងាយស្រួលជាងមុន។ លោក សូ វុទ្ធី តំណាងស្ថាបនិក ទុរេននាគខៀវបឹងកេត បានប្រាប់សារព័ត៌មាន Tnaot News កាលពីពេលថ្មីៗនេះថា លោក ពិតជាគាំទ្រការសម្រេចចិត្តរបស់ប្រមុខរដ្ឋាភិបាលកម្ពុជា ដែលបានបិទការនាំចូលកសិផលពីក្រៅប្រទេស ឬប្រទេសជិតខាង ហើយលោកគិតថានេះ គឺជាឱកាសល្អសម្រាប់អោយកសិករកម្ពុជា ពង្រឹងសមត្ថភាពទៅលើការដាំដុះដំណាំកសិផលរបស់ពួកគេ ផ្គត់ផ្គង់លក់នៅលើទីផ្សារ។ តំណាងស្ថាបនិក ទុរេននាគខៀវបឹងកេតរូបនេះ បានបន្ថែមថាសម្រាប់ចំការទុរេននាគខៀវបឹងកេត បើទោះបីជាបិទមិនឱ្យមានការនាំចូលទុរេនពីប្រទេសជិតខាង តែលោកនៅតែអះអាងថា ទុរេននាគខៀវបឹងកេត នៅតែអាចផ្គត់ផ្គង់ទុរេនទៅដល់អតិថិជនបានគ្រប់មជ្ឈដ្ឋាន ខណៈនៅឆ្នាំ២០២៦-២០២៧ខាងមុខនេះ ក្រុមហ៊ុនទុរេននាគខៀវបឹងកេត គ្រោងនឹងពង្រីកផ្ទៃដីដាំដុះជាង២០០ហិកតាបន្ថែមទៀត។ 

លោក បូ សុភ័ក្រ្ត កសិករដាំដំណាំម្ទេស រស់នៅភូមិស្តុកប្រវឹក ឃុំស្តុកប្រវឹក ស្រុករុក្ខគិរី ខេត្តបាត់ដំបង បានលើកឡើងថា លោកបានដំណាំម្ទេសនេះ រយៈពេលជាង៥ឆ្នាំមកហើយនៅលើផ្ទៃដីប្រមាណជិត១ហិកតា ខណៈលោកសម្លឹងមើលឃើញថា មុខរបរដាំដំណាំម្ទេស គឺងាយស្រួលដាំដុះ និងកំពុងមានទីផ្សារខ្លាំងពីអតិថិជន។ 

កសិករមានដើមកំណើតខេត្តបាត់ដំបងរូបនេះ បានបន្ថែមថា ការបិទច្រកព្រំដែនកម្ពុជា-ថៃ គឺមិនមានផលប៉ះពាល់ដល់ការដាំដុះ និងផ្គត់ផ្គង់កសិផលក្នុងស្រុកនោះទេ ផ្ទុយទៅវិញ វាគឺជាឱកាសសម្រាប់កសិករងាយស្រួលរកទីផ្សារលក់ផលិតរបស់ពួកគេទៅវិញ។ គួររំលឹកថា កម្ពុជាបានសម្រេចបិទច្រកព្រំដែន ហាមឃាត់ការនាំចូលបន្លែ ផ្លែឈើពីប្រទេសថៃ នៅគ្រប់ច្រកព្រំដែនទាំងអស់កាលពីថ្ងៃទី១៧ ខែមិថុនា ទោះបីមានការបិទការនាំចូលបន្លែ ផ្លែឈើពីប្រទេសថៃ ក្រសួងកសិកម្ម រុក្ខាប្រម៉ាញ់ និងនេសាទ អះអាងបញ្ជាក់ថា កម្ពុជាមានសមត្ថភាពផលិតគ្រប់គ្រាន់ ដើម្បីធានាដល់តម្រូវការសន្តិសុខស្បៀង ហើយរាល់ការនាំចូលបន្លែ ផ្លែឈើ និងធាតុចូលកសិកម្មដទៃទៀត សុទ្ធតែអាចជំនួសបានទាំងស្រុង ដោយផលិតកម្មក្នុងស្រុក និងប្រភពនាំចូលដទៃទៀតបាន៕