យ៉ាងហោចណាស់មានអ្នកស្លាប់ចំនួន ០៩នាក់ ត្រូវបានរាយការណ៍ បន្ទាប់ពីទឹកជំនន់ភ្លាមៗ និងការបាក់ដីដែលបង្កឡើងដោយភ្លៀងធ្លាក់ខ្លាំងរយៈពេលវែងនៅក្នុងខេត្ត Bắc Kạn និង Lai Châu របស់ប្រទេសវៀតណាម ចាប់តាំងពីថ្ងៃទី១៦ ខែឧសភា ឆ្នាំ២០២៥។

ទឹកជំនន់ភ្លាមៗដែលបង្កឡើងដោយភ្លៀងធ្លាក់ខ្លាំងនៅក្នុងខេត្ត Bắc Kạn ចាប់ពីយប់ថ្ងៃទី១៦ ដល់ថ្ងៃទី ១៧ ខែឧសភាបានឆក់យកជីវិតមនុស្សយ៉ាងហោចណាស់ ៤នាក់និងបានធ្វើឱ្យមនុស្សម្នាក់បាត់ខ្លួន។

ការរអិលបាក់ដីជាច្រើនត្រូវបានគេរាយការណ៍នៅក្នុងតំបន់ជាច្រើនបន្ទាប់ពីមានភ្លៀងធ្លាក់ខ្លាំង រួមទាំងស្រុក Ba Bể ដែលរងផលប៉ះពាល់ខ្លាំងបំផុត។ ផ្ទះរាប់សិបខ្នង និងផ្ទៃដីដំណាំធំៗបានរងការខូចខាតយ៉ាងខ្លាំង។

ទឹកជំនន់ភ្លាមៗបានវាយប្រហារភូមិ Tân Luột ឃុំ Đồng Phúc កាលពីថ្ងៃសៅរ៍ បន្ទាប់ពីមានភ្លៀងធ្លាក់ខ្លាំងជាងពីរម៉ោង។ យ៉ាងហោចណាស់មានមនុស្ស២នាក់ត្រូវបានរាយការណ៍ថាបានស្លាប់។ កាលពីថ្ងៃអាទិត្យ ភ្លៀងធ្លាក់ខ្លាំងបានបង្កការបាក់ដីនៅក្នុងឃុំ Yến Dương បណ្តាលឲ្យរលំផ្ទះមួយខ្នង។ មនុស្ស២នាក់បានស្លាប់ និងម្នាក់ទៀតរងរបួស។ មនុស្សម្នាក់ត្រូវបានគេរាយការណ៍ថាបានបាត់ខ្លួនបន្ទាប់ពីទឹកជំនន់នៅខេត្ត Đồng Phúc។ 

លោក Nong Ngọc Duyên ប្រធានគណៈកម្មាធិការប្រជាជនស្រុកបាននិយាយថា ក្រុមជួយសង្គ្រោះត្រូវបានបែងចែកជាពីរក្រុម ដើម្បីទៅដល់តំបន់រងគ្រោះ និងស្វែងរកអ្នកបាត់ខ្លួន។ មជ្ឈមណ្ឌលជាតិសម្រាប់ការព្យាករណ៍ធនធានជលសាស្ត្របានព្រមានពីភ្លៀងធ្លាក់ខ្លាំងបន្ថែមទៀតនៅទូទាំងតំបន់ភាគខាងជើង រួមទាំង Tuyên Quang ចាប់ពីថ្ងៃទី២២ ដល់ថ្ងៃទី២៥ ខែឧសភា។ ទឹកភ្លៀងត្រូវបានគេរំពឹងថានឹងឡើងដល់ ១០០-២៥០ មីលីម៉ែត្រ ជាមួយនឹងតំបន់ខ្លះទំនងជាលើសពី ៣៥០មីលីម៉ែត្រ៕