ថៃបាននិយាយកាលពីថ្ងៃព្រហស្បតិ៍ថា ប្រជាជនមីយ៉ាន់ម៉ាជាង៣០០ នាក់បានភៀសខ្លួនចូលទៅក្នុងប្រទេសថៃដើម្បីស្វែងរកទីជ្រកកោន បន្ទាប់ពីការវាយលុកលើយោធាដោយក្រុមប្រដាប់អាវុធជនជាតិភាគតិច ប៉ុន្មានថ្ងៃបន្ទាប់ពីរបបយោធាបានបន្តបទឈប់បាញ់ក្រោយការរញ្ជួយដី។

ប្រទេសមីយ៉ាន់ម៉ាបានជាប់គាំងនៅក្នុងជម្លោះស៊ីវិលចាប់តាំងពីរដ្ឋប្រហារយោធាក្នុងឆ្នាំ ២០២១ ដោយរបបយោធាបានប្រយុទ្ធជាមួយនឹងក្រុមចម្រុះនៃអង្គការប្រដាប់អាវុធជនជាតិភាគតិច និងកងកម្លាំងតស៊ូគាំទ្រលទ្ធិប្រជាធិបតេយ្យ។ យោងតាមយោធាថៃបានឲ្យដឹងថា ការវាយប្រហារកាលពីថ្ងៃពុធដោយកងទ័ពរំដោះជាតិ Karen (KNLA) និងអង្គការការពារជាតិ Karen ដែលជាសម្ព័ន្ធមិត្តរបស់ខ្លួន (KNDO) បានកំណត់គោលដៅលើមូលដ្ឋានយោធាក្នុងរដ្ឋ Kayin ចម្ងាយប្រហែល ២.៥ គីឡូម៉ែត្រពីព្រំដែនថៃ។

 សេចក្តីថ្លែងការណ៍មួយបាននិយាយថា ការវាយប្រហារនេះពាក់ព័ន្ធនឹងការឡោមព័ទ្ធមូលដ្ឋានក្នុងរយៈចម្ងាយជិត និងការប្រើប្រាស់យន្តហោះគ្មានមនុស្សបើកប្រដាប់អាវុធ ដើម្បីទម្លាក់គ្រឿងផ្ទុះជាបន្តបន្ទាប់ពេញមួយថ្ងៃ។ មន្ត្រីបាននិយាយថា គិតត្រឹមថ្ងៃព្រហស្បតិ៍ ជនជាតិមីយ៉ាន់ម៉ាចំនួន ៣២៧ នាក់បានឆ្លងចូលទៅក្នុងប្រទេសថៃ ហើយកំពុងស្នាក់នៅក្នុងទីតាំងបណ្តោះអាសន្នចំនួនពីរ រួមទាំងប្រាសាទមួយ ដោយយោធា និងប៉ូលិសថៃផ្តល់សន្តិសុខ និងជំនួយមនុស្សធម៌៕