ឯកអគ្គរដ្ឋទូតចិនប្រចាំនៅកម្ពុជា លោក វ៉ាង វិនពីន (Wang Wenbin) ជឿជាក់ថាក្នុងឆ្នាំទេសចរណ៍ចិន-កម្ពុជា២០២៥ ភ្ញៀវទេសចរចិនកាន់តែច្រើននឹងមកលេងកម្សាន្តដោយសារភាពទាក់ទាញនៃសម្រស់រាជធានីភ្នំពេញ។

តាមរយៈសារលើបណ្តាញសង្គមរបស់លោកឯកអគ្គរដ្ឋទូតចិន នៅលើបណ្តាញសង្គមរបស់លោកបានលើកឡើងថា៖«រាជធានីដ៏រស់រវើករបស់ប្រទេសកម្ពុជា ជាប់ចំណាត់ថ្នាក់លេខ២ក្នុងចំណោមទីក្រុងចំនួន ១៤ ដែលមានកន្លែងរីករាយនៅពេលរាត្រីដ៏ល្អបំផុត ដែលនេះជ្រើសរើសដោយគេហទំព័រទិដ្ឋការអនឡាញ VISA2FLY។ ជឿជាក់ថា នៅក្នុងឆ្នាំទេសចរណ៍ចិន-កម្ពុជា២០២៥នេះ ភ្ញៀវទេសចរចិនកាន់តែច្រើននឹងមកលេងកម្សាន្តដោយសារភាពទាក់ទាញនៃសម្រស់រាជធានីភ្នំពេញ»។

គួរឲ្យដឹងដែរថា កម្ពុជា និងចិន ឯកភាពកំណត់យកឆ្នាំ២០២៥ ជា “ឆ្នាំទេសចរណ៍កម្ពុជា-ចិន” និងលើកទឹកចិត្តប្រជាពលរដ្ឋខ្លួនឱ្យធ្វើដំណើររវាងប្រទេសទាំងពីរ។ ភាគីទាំងពីរនឹងរួមគ្នាអភិវឌ្ឍវិថីទេសចរណ៍ លើកកម្ពស់ការផ្សព្វផ្សាយគោលដៅទេសចរណ៍ និងពង្រឹងកិច្ចសហប្រតិបត្តិការផ្នែក សុវត្ថិភាពទេសចរណ៍។ 

យោងតាមទិន្នន័យក្រសួងទេសចរណ៍ឆ្នាំ ២០២៤ កម្ពុជាទទួលបានភ្ញៀវទេសចរអន្តរជាតិសរុប ៦.៧លាននាក់ កើនឡើង ២២.៩ភាគរយ ធៀបនឹងឆ្នាំ២០២៣។ ក្នុងនោះ ជនជាតិចិនដែលមកទស្សនាកម្ពុជា មានជាង៨៤ម៉ឺននាក់ កើនឡើង ១២.៧% ស្ថិតនៅលេខរៀងទី៣ ខណៈរយៈពេល ២ខែដើមឆ្នាំ២០២៥ ភ្ញៀវចិនដែលមកកម្ពុជា ចំនួនជាង ១៨ម៉ឺននាក់៕