ក្រសួងការងារថៃបានប្រកាសកាលពីថ្ងៃអង្គារថា ពលករចំណាកស្រុកមកពីប្រទេសកម្ពុជា ឡាវ និងមីយ៉ាន់ម៉ា ដែលគ្រោងនឹងត្រឡប់មកប្រទេសកំណើតវិញក្នុងអំឡុងពិធីបុណ្យសង្ក្រាន្ត ឬនៅពេលណាក៏បានចន្លោះពីថ្ងៃទី ១ ខែមេសា ដល់ថ្ងៃទី ១៥ ខែឧសភា នឹងមិនត្រូវការលិខិតអនុញ្ញាតចូលវិញនោះទេ។

ថ្ងៃបុណ្យសង្ក្រាន្ត ឬចូលឆ្នាំប្រពៃណីរបស់ប្រទេសថៃត្រូវបានប្រារព្ធពីថ្ងៃទី ១៣ ដល់ ១៥ ខែមេសា ជារៀងរាល់ឆ្នាំ។ ពិធីបុណ្យនេះក៏ត្រូវបានប្រារព្ធនៅប្រទេសជិតខាងមួយចំនួនដែរ ប៉ុន្តែមានទម្រង់ខុសគ្នាបន្តិច។

រដ្ឋមន្ត្រីក្រសួងការងារ លោក Phiphat Ratchakitprakarn បានមានប្រសាសន៍ថា ការលើកលែងលិខិតអនុញ្ញាតឲ្យចូលធ្វើការវិញក្នុងគោលបំណង ដើម្បីសម្រួលការធ្វើដំណើរមានភាពងាយស្រួលសម្រាប់កម្មករមកពីប្រទេសជិតខាង និងកាត់បន្ថយការចំណាយរបស់ពួកគេក្នុងរដូវបុណ្យទាន។

លោកបានមានប្រសាសន៍ថា ពលករចំណាកស្រុកមានសារៈសំខាន់ចំពោះសេដ្ឋកិច្ចថៃ។ ការលើកលែងនេះត្រូវបានចាត់ទុកថាជាកាដូរ ដែលអនុញ្ញាតឱ្យពួកគេត្រឡប់ទៅធ្វើការនៅប្រទេសថៃវិញជាមួយនឹងសីលធម៌កាន់តែប្រសើរឡើង ។

ការលើកលែងនេះអនុវត្តចំពោះតែអ្នកកាន់លិខិតឆ្លងដែនកម្ពុជា ឡាវ ឬមីយ៉ាន់ម៉ាដែលមានទិដ្ឋាការមិនមែន L-A (ពលករស្របច្បាប់) ដែលមានសុពលភាពលើសពីថ្ងៃទី ១៥ ខែឧសភា។ លោក Phiphat បន្តថា អ្នកដែលចង់ត្រឡប់ទៅប្រទេសថៃក្រោយថ្ងៃទី ១៥ ខែឧសភា នឹងតម្រូវឲ្យមានត្រាវាយចូលវិញដូចធម្មតា៕