ក្រសួងពាណិជ្ជកម្ម កាលពីព្រឹកមិញនេះ បានចេញសេចក្តីជូនដំណឹងស្ដីពី ការរៀបចំ «ពិព័រណ៍ផលិតផលខ្មែរ» ក្នុងព្រឹត្តិការណ៍អង្គរសង្ក្រាន្ត ក្រោមប្រធានបទ “ញញឹមសាទរសង្ក្រាន្តឆ្នាំថ្មី» ពីថ្ងៃទី១៤ រហូតដល់ថ្ងៃទី១៦ ខែមេសា ឆ្នាំ២០២៥ នៅបរិវេណមុខប្រាសាទអង្គរវត្ត នៅទីក្រុងសៀមរាប ខេត្តសៀមរាប។ «ពិព័រណ៍ផលិតផលខ្មែរ» ក្រោមកិច្ចសហការរវាង ក្រសួងពាណិជ្ជកម្ម ជាមួយសហភាពសហព័ន្ធយុវជនកម្ពុជា រៀបចំព្រឹត្តិការណ៍ពិព័រណ៍នេះឡើង ក្នុងគោលបំណង ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីខ្មែរ។ ទោះបីជាយ៉ាងណា ព្រឹត្តិការណ៍នេះជាឱកាសដែល ប្រជាពលរដ្ឋខ្មែរ បានជួបជុំគ្នាក្នុងនាមជាមហាគ្រួសារខ្មែរ ដើម្បីអបអរសាទរពិធីបុណ្យចូលឆ្នាំប្រពៃណីជាតិ ហើយវានឹងក្លាយទៅជាវេទិកាចែករំលែកបទពិសោធន៍ របស់មនុស្សជំនាន់មុន និងយុវជនជំនាន់ក្រោយ ហើយក៏បានប្រែក្លាយទៅជាយន្តការអភិរក្ស និងអភិវឌ្ឍន៍ វប្បធម៌ប្រពៃណីខ្មែរ។

យ៉ាងណាមិញ ក្រសួងពាណិជ្ជកម្ម ក៏បានអំពាវនាវដល់ពាណិជ្ជករ និងសាធារណជនទូទៅ ដែលមានចំណាប់អារម្មណ៍ ចង់ចូលរួមដាក់តាំងបង្ហាញ លក់ផលិតផលឬសេវាកម្ម និងស្វែងរកដៃគូពាណិជ្ជកម្ម ក្នុងព្រឹត្តិការណ៍«ពិព័រណ៍ផលិតផលខ្មែរ» សូមទំនាក់ទំនងមកបំពេញបែបបទចូលរួម តាមរយៈនាយកដ្ឋានកិច្ចការពិព័រណ៍ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្មផងដែរ៕